Greinar um hreyfinguHreyfing

Rétt líkamsbeiting

Rétt líkamsbeiting er ekki síður mikilvæg til að halda heilsu, en regluleg hreyfing og þjálfun líkama og hugar.

Regluleg hreyfing er fyrir okkur mannfólkið meira en bara að halda góðri heilsu, hún er líka gott mótvægi við streitu. Það þarf líka alltaf að huga að góðri líkamsstöðu við það sem að við erum að gera í lífinu. Hvort heldur er við vinnu, þjálfun eða leik. Jafnvægi milli vöðvahópa raskast við langvarandi og síendurteknar slæmar stöður. Vöðvarnir hafa tilhneigingu til að verða stuttir og stífir annars vegar og langir og slappir hins vegar.

Algengt umkvörtunarefni er t.d. hjá fólki sem að vinnur mikið við tölvur og notar ætíð hægri hönd við tölvumúsina, að verkur leiði frá ofanverðu herðablaði upp hálsinn og upp í höfuð. Þetta getur valdið miklum og endurteknum höfuðverkjum og stífum hálsi hægra megin. Þarna er komið ójafnvægi sem að þarf að takast á við hið fyrsta.

Til að bæta líkamsstöðuna, þarf til að byrja með að verða meðvitaður um hvað þarf að laga. Oftast þarf að byrja á að teygja stutta vöðva og styrkja slappa vöðva. Oftar en ekki þarf litlu að breyta, en litlu breytingarnar þurfa ekkert að vera auðveldari en þær stóru. Því að tilhneygingin er ansi oft að fljótt er dottið í sama farið, sömu stöðurnar. Því er mikilvægt að vera sífellt að minna sig á að:

Slaka vel á öxlunum.

Rétta vel úr bakinu.

Aldrei að læsa hnjánum.

Ekki ætti heldur að standa mikið með allan þunga á öðrum fæti, heldur að reyna að jafna þunganum á báðar fætur. Einnig að passa uppá að hnén séu ekki læst og afturspennt, það veldur gífurlega miklu álagi á mjóbakið, sem að gæti endað í sífelldum þreytuverkjum uppeftir bakinu. Reynið að halda hryggnum ávalt í réttri stöðu og beygja frekar fætur við að lyfta upp hlutum, en að nota bakið í þungann.

Við skrifstofu- og tölvuvinnu þar sem mikið er setið, þarf að huga vel að gæðum stólanna sem notaðir eru og kynna sér vel stillingamöguleika þeirra, t.d.:

Hæðar- og hallastillingu setunnar.

Hæðar- og hallastillingu baksins.

Hæðarstillingu armanna.

Stillingum stólsins ætti að breyta annað slagið, það gerir líkamanum gott. Hægt væri að reyna að æfa sig í að nota tölvumúsina til skiptis með hægri og vinstri hendi. Alls ekki auðvelt, en alveg þess virði að prófa, því það getur dregið verulega úr líkunum á álagseinkennum frá öxlum. (Hægt er að breyta stillingunni á músinni þannig að hægri takkinn verði aðal-skipunartakkinn. Farið inn á stillingar fyrir músina í Control Panel)

Það að standa upp reglulega og teygja úr sér, getur gert gæfumuninn, því ef setið er of lengi í sömu stöðu, stífna vöðvarnir frekar. Auk þess er það gott fyrir einbeitingu hugans við verkið. Alltaf ætti að brjóta upp langar vinnutarnir með stuttum hvíldarhléum. Ganga aðeins um, teygja á stífum, þreyttum vöðvum og hrista sig aðeins til að losa um spennu.

Verum meðvituð um líkamsstöðuna, minnum okkur stöðugt á og komum í veg fyrir óþarfa vandamál í stoðkerfinu, áður en í óefni er komið.

Höfundur: Guðný Ósk Diðriksdóttir

Previous post

Hversu mikil hreyfing er nóg?

Next post

Mikilvægi hreyfingar

No Comment

Leave a reply

Your email address will not be published. Required fields are marked *