Hormónalyf gegn offitu

Á fréttavef BBC í gær, þann 16.01.07, kom frétt frá prófessor Steve Bloom við London Imperial College um að verið væri að þróa nýja lausn fyrir of feitt fólk.

Offita er orðið mjög mikið vandamál í Bretlandi og kemur fram í sömu frétt að fleiri deyji í Bretlandi, en í nokkru öðru Evrópulandi, úr offitutengdum sjúkdómum. Þar í landi hefur vandinn þrefaldast síðastliðin 20 ár og er enn á hraðri uppleið.

 

Um er að ræða tyggjó sem að inniheldur hormónið Pancreatic polypeptide sem líkami okkar framleiðir í lok hverrar máltíðar til að slá á matarlöngun. Tyggjóið á að vera þeim eiginleika gætt, að viðkomandi einstaklingur í yfirvigt á að líða eins og að magi hans sé fullur. Þetta er haft eftir prófessor Bloom.

 

Hægt er að sprauta þessu hormóni í fólk og hefur það verið leiðin, en betra sé að þurfa ekki svo gróft  inngrip inn í líkamann og því hafi verið farið í að leita nýrra og auðveldari leiða fyrir fólk að taka inn þetta hormón.

 

Hugmyndin um að setja það í tyggjó var augljós, þar sem að þeir sem að eru í yfirvigt hljóti að líka vel að tyggja, er einnig haft eftir Prófessor Bloom.

 

En þetta hormónatyggjó er enn í þróun og því gæti orðið nokkur bið á að það komist í sölu fyrir neytendur.

 

Nú er spurning hvort að hægt verði að tyggja sig grannan?

Og svo aftur hvort og þá hvaða afleiðingar inntaka þessa hormóns eigi eftir að hafa á aðra líkamsstarfsemi þegar að fram líða stundir?

  Prenta Senda þetta á vin